VIII Abelleira Mariñeira

O vindeiro día 6 de agosto vai ter lugar a VIII Abelleira Mariñeira na praia de Ventín (Abelleira) organizada pola AVV A Ostreira e a AC Pontevella.

O programa inclue navegación de Muros a Abelleira, Desembarco pirata, xantar e pola tarde navegacións e actuacións musicais. Os interesados en participar na festa-xantar teñen que anotarse antes do 29 de xullo e pagar polo menos o 50% do prezo. Máis información no 659 986 753.

XX Encontro de Embarcacións Tradicionais de Bueu

Os vindeiros 29, 30 e 31 de xullo vai ter lugar o XX Encontro de Embarcacións Tradicionais de Bueu, organizado polos Galos.

Do programa destacamos a charla-coloquio "Feitura e xenero do traxe mariñeiro tradicional" con Andrea Menéndez no Museo Massó o 29 ás 21:00 h, a visita guiada ao Museo Massó o día 30 ás 12:00 h e a largada dunha rapeta na praia da Banda do rio o mesmo día 30 ás 20:00 h e por suposto haberá navegacións o 30 e o 31.

Durante a semana do 25 ao 31 de xullo haberá unha exposición e obradoiros para nenos na Sala Amalia Domínguez, sigraduras didácticas coas asociacións de Bueu e un obradoiro de confeccións de redes no Museo Massó o xoves 28 ás 12:00h

Os interesados en participar co seu barco teñen que inscribirse enviando esta ficha cuberta a galosbueu@yahoo.es

XIV Regata Concentración de Embarcacións Tradicionais Porto de Redes

Os vindeiros 22 e 23 de xullo vai ter lugar a XIV Regata Concentración de Embarcacións Tradicionais Porto de Redes organizada polo Club Marítimo de Redes.

O venres 22 a partir das 17:00 h haberá desafíos barco contra barco. Poida que sexa outra oportunidade para ver o duelo entre o Sauntress e o Abur.
O sábado 23 a partir das 17:00 h haberá regata-concentración. Ás 20:00 entregaranse os agasallos aos participantes e haberá unha paparota, coa actuación de 3DBAND ás 21:30.

Seguen as singraduras didácticas no Museo Massó

O domingo 17 de xullo ás 17:00 h volve sair o Ave de paso nunha singradura didáctica pola ría de Pontevedra organizada polo Museo Massó. A inscrición é gratuíta por estrita orde de reserva e deberá realizarse chamando ao teléfono: 986 321 838

Centenario do Joaquín Vieta

O vindeiro 23 de xullo ás 18:30 h vai ter lugar no Freixo a conmemoración dos cen anos da botadura do Joaquín Vieta. O Vieta é un balandro de dous paus, con 18 metros de eslora, construído no Freixo entre 1915 e 1916. Orixinariamente traballou para as fábricas de salga, fixo cabotaxe, de barco bateeiro, batea e finalmente restaurado traballa como barco-museo en actividades de turismo cultural. Unha longa vida de 100 anos.

A Asociación Joaquín Vieta quere celebrar o centenario do seu barco rememorando o que hai 100 anos era a botadura dun barco como o Vieta. No programa está previsto que o barco estea engalanado, haxa recepción de autoridades, bautismo do barco pola madriña, botadura, e finalmente festa. O acto estará acompañado no mar polos barcos tradicionais da ría de Muros e Noia.

En días previos a este acto de conmemoración haberá a presentación do libro Centenario do balandro Joaquín Vieta, e da revista Alameda, do Liceo de Noia, con páxinas especiais adicadas ao centenario do balandro.

Tamén no mesmo día 23 ás 13 h haberá o nomeamento de Novos Mariñeiros do Vieta. Este nomeamento está dirixido a aquelas persoas que queiran formar parte do colectivo que coida e manten en actividade ao Joaquín Vieta.

Parabéns á Asociación Joaquín Vieta polo titánico esforzo feito para que non se perdese este fermoso barco, para que os máis novos poidan saber como eran os barcos que daban traballo e vida á xente da ría de Muros e Noia hai cen anos. Para que todos poidamos desfrutar da fermosa fasquía deste balandro que leva nas súas cadernas 100 anos de sal e suor.

Os barcos tradicionais nas fotos de Xurxo Lobato

Xurxo Lobato, fotógrafo de recoñecido prestixio, está a seguir os eventos relacionados co noso patrimonio marítimo. Como produto dese traballo pódese ver na súa páxina web unha galería de fotos sobre o tema. Lobato non é un recen chegado ao mundo do patrimonio marítimo, entre outros traballos é o autor das fotografías do libro Xentes do mar do Grove, de Olegario Sotelo Blanco.

Agradecémoslle a Xurxo Lobato que nos dese permiso para usar aquí un par de fotos del, unha ilustrando un post anterior, e a outra a que ilustra este post, sacada en Muros mira ao mar e na que se pode ver o Joaquín Vieta e a Meca.

Regatas de faluchos. XII Campionato do mundo

Os Mariñeiros de Bouzas organizan o vindeiro sábado 16 de xullo o XII Campionato do mundo de faluchos. As regatas serán ás 12:00 h na praia de Bouzas.

Haberá varias categorías para competir (infantil, xuvenil, feminina, senior e veteranos). Para participar é obrigatorio saber nada e vogar e no caso da categoría infantil será precisa autorización dos pais.

IV Xuntanza Patexeira de Embarcacións Tradicionais. Sada

Os vindeiros días 16 e 17 de xullo vai ter lugar en Sada a IV Xuntanza Patexeira de Embarcacións Tradicionais, que organiza a ACM Os Patexeiros.

O programa provisional inclue unha mostra de material de carpintería de ribeira e marítimo, audivisuais, xogos para nenos, etc. Haberá navegacións mañá e tarde e no sábado os quen queiran poderán participar cos seus barcos na procesión do Carme. Asimesmo o sabado haberá xantar e cea para os participantes

XIX Regata dos Faros. O Grove

O vindeiro sábado 16 de xullo vai ter lugar no Grove a XIX Regata dos Faros, organizada por Amigos da Dorna Meca.
Coa saída ás 16:00 h, a regata transcorre entre o porto, a baliza do Arido e os faros do Galinheiro, Umias e Sinás, aínda que o percorrido final variará en función da meteoroloxía.

Lembramos que os interesados en participar deben ter os seguros ao día e as medidas de seguridade precisas a bordo.

A Aixola restaura un bote de instrución da Escola Naval Militar de Marín

O pasado venres entregouse na Aixola á Escola Naval Militar de Marín un bote de instrución de nove metros logo de que fose restaurado polos alumnos do centro. Este bote foi construído a mediados do século XX en Astilleros Lagos, en Bouzas, e é similar ao bote de nove metros que ten o Clube do Mar de Ferrol e do que se publicou información no Apupo nº 6.
Parabéns á Aixola por esta restauración de tan boa calidade e parabéns á Escola Naval Militar por este barco que ven enriquecer o patrimonio marítimo.

(Imaxe: CETMAR)

Distribuir contido

  Acaba de publicarse no DOG a Lei 5/2016, do 4 de maio, do patrimonio cultural de Galicia....
  Desde a Federación Federación Galega pola Cultura Marítima e Fluvial (Culturmar) vemos con...