A Sociedad de Salvamento de Náufragos de Vigo

Dentro da serie "Efemérides do Porto de Vigo" o Arquivo do Porto de Vigo publicou recentemente un número dedicado á Sociedad de Salvamento de Náufragos de Vigo.

A Sociedad creouse en Vigo en 1881, formando parte da Sociedad Española de Salvamento de Náufragos. No ano 1902 Antonio Sanjurjo Badía, o seu presidente, acordou coas autoridades construir unha estación de salvamento no porto sufragada pola Sociedad. Este edifico logo foi usado como sede do Instituto Oceanográfico de Vigo en 1917, Pasando a estación de salvamento a Baiona.

Esta publicación da autoría de Beatríz Bruna, arquiveira do Porto de Vigo, fai a número 39 dunha serie que paga moito a pena ler, pola calidade dos textos e imaxes, e pola diversidade de temas tratados.

Os estaleiros de Moaña camiño da catalogación


No DOG do venres 13 de xaneiro publicase a resolución da Dirección Xeral de Patrimonio Cultural pola que se inicia o procedemento de inclusión no Catálogo do patrimonio cultural de Galicia do conxunto dos estaleiros de Casqueiro-Calragho en Moaña como lugar de valor etnolóxico.

Esta é unha excelente noticia. Logo de inumerables problemas para manter en pé os estaleiros ameazados por un paseo marítimo a Consellería de Cultura recoñece o valor patrimonial destes mediante a inclusión no Catálogo do patrimonio cultural de Galicia. Hai que destacar que no croquis que acompaña á resolución contémplanse as anguías de ambos estaleiros como parte dos bens e por tanto protexidas cando se cataloguen definitivamente

A inclusión no catálogo non é automática, ábrese agora un prazo de alegacións dun mes e logo a Consellería deberá nun prazo máximo de 18 meses acordar a catalogación dos estaleiros.

Os nosos parabéns aos compañeiros de Sueste, que levan moitos anos traballando para a salvagarda destas instalacións e da actividade da carpintería de ribeira en Moaña.

(Imaxe: Mariñeiros de Bouzas)

O Museo do Mar de Noia, Premio Barbantia á Iniciativa Cultural no Barbanza 2016

O pasado día 3 foille entregado o Premio Barbantia á Iniciativa Cultural no Barbanza 2016 ao Museo do Mar de Noia, unha iniciativa da Asociación Mar de Noia. Os nosos parabéns a Mar de Noia por este merecido premio.

O Museo xa é unha realidade, pero pronto disporá dunha nova sede que se vai construir na zona vella de Noia. Este novo edificio vai aumentar moito o espazo dispoñible para mostrar os numerosos fondos cos que xa conta o Museo. Pero o elemento destacable deste museo é a xente que o levantou cun traballo ininterrumpido de 13 anos e as moitas persoas que colaboran desinteresadamente para seguir mellorandoo cada día.

Paga sempre a pena unha visita ao Museo do Mar de Noia, pero agora en Nadal quen se achegue pode ver un magnífico belén mariñeiro e mañá 18 de decembro ás 13:00 h poderá oir o Concerto de panxoliñas a cargo do Coro "Has de cantar" do IES Virxe das Mareas.

(Imaxe: Pedro G. Losada)

A represión franquista no mar da Coruña

Recentemente Alejandro Gándara publicou un amplo artigo en La Opinión da Coruña sobre a represión franquista no mar da Coruña No artigo faise un resume da forte presencial sindical no sector do mar, como a xente do mar foi branco preferente das forzas sublevadas, chegando a matar a 19 persoas na cidade da Coruña, e da reacción a esta represión mediante as fuxidas por mar, que no caso da zona da Coruña son 22 as que están documentadas.

Este traballo está baseado en datos achegados polo proxecto Nomes e voces e especialmente polos traballos de Dionísio Pereira, que ten gran parte da súa produción investigadora libremente accesible no seu web. Destacamos O Asociacionismo dos pescadores na Galiza de anteguerra: Unha ollada de conxunto e Loita de clases e represión franquista no mar (1864-1939), entre outros moitos traballos relacionados con diferentes aspectos do mar.

Xornadas culturais en Bouzas

Os vindeiros días 16 e 17 de decembro van ter lugar dous eventos na nova sede de Mariñeiros de Bouzas. O venres 16 ás 20:00 h haberá unha charla con D. Isidro Alonso Marcial, "Tesouro humán vivo", organizada pola Asociación Cultural Vila de Bouzas e coa colaboración de Mariñeiros de Bouzas.

O sábado 17 de decembro haberá unha Xornada do patrimonio marítimo, organizada por Mariñeiros de Bouzas. Ás 11:00, 12:00 e 13:00 h haberá visitas guiadas ao pantalán de barcos tradicionais. Pola mañá tamén haberá un obradoiro de pesca infantil. Ás 18:00 h haberá a charla Para que conservar o patrimonio marítimo?. E de 11:00 a 20:00 h estarán abertas as exposicións Os primeiros motores foraborda en Galicia, e Patrimonio do vento e do sal.

BIC para a vela latina na Albufera de Valencia

O Consell da Generalitat Valenciana declarou Ben de Interese Cultural inmaterial a pesca artesanal e a navegación a vela latina na Albufera de Valencia.

Na zona da Albufera hai varias asociacións de vela latina que se agrupan na Federació Cultural Valenciana de Vela Llatina, e que promoveron a declaración de BIC xunto coas comunidades de pescadores de Palmar, Catarroja e Silla. Serán estas entidades as encargadas da xestión do Ben.

Os nosos parabéns a estas entidades que conseguiron que o goberno valenciano recoñeza a importancia cultural da vela latina e que mediante esa declaración de BIC se senten as bases para a súa salvagarda, tanto da continuidade da transmisión dos coñecementos asociados á vela latina como da súa integridade ao considerar os perigos de desvirtuación aos que se pode ver sometido ese valioso elemento cultural polo turismo masivo.

Esta declaración como BIC ven xuntarse á que o Goberno de Canarias fixera da "La Vela Latina Canaria de Las Palmas de Gran Canaria" recoñecendo a singularidade das regatas de vela latina no porto das Palmas.

(Imaxes: Federació Cultural Valenciana de Vela Llatina)

O Encontro de Embarcacións Tradicionais de Galicia no Culturgal

No marco da pasada edición do Culturgal, dentro das actividades promovidas pola Deputación de Pontevedra e grazas ao apoio do Concello de Poio, presentouse o vindeiro XIII Encontro de Embarcacións Tradicionais de Galicia, que vai ter lugar en Combarro do 29 de xuño ao 2 de xullo do 2017.
A presentación estivo a cargo de Joaquín Fabeiro, presidente da C.M A Reiboa, e presidente do comité organizador, Xosé Luís Martínez, concelleiro de Poio, e Manuel G. Sendón, presidente de Culturmar.

Os traballos de organización do Encontro xa van avanzados e cóntase co compromiso económico das administracións similar ao de pasadas edicións. Pronto se activará a páxina web do Encontro, onde se poderán inscribir os barcos e se dará a información necesaria para as persoas interesadas en participar ou simplemente visitar Combarro os días do Encontro para gozar co espectáculo dos barcos navegando e da completa oferta cultural e festiva que supón o Encontro. Mentras non se activa o web pódese consultar a páxina en facebook do XIII Encontro

XII Semana do Mar. Marín

Do 5 ao 11 de decembro vai ter lugar na Casa da Cultura de Seixo, en Marín, a XII Semana do Mar, organizada pola Asociación de Pescadores de Aguete "Chirleu" e o Grupo Cultural Ronsel.

O programa é o seguinte:

  • Luns 5, 20:00 h Inauguración da exposición "Os oficios do mar"
  • Martes 6. Excursión ao Museo Casa do Barco en Vila do Conde, con saída ás 9:30 h desde Seixo
  • Mércores 7, 20:00 h Conferencia de José M. Castaño García "Para ser grumete. Unha experiencia na divulgación da historia marítima"
  • Xoves 8, 20:00 h Proxección do documental "Mercadores e baleeiros. Unha historia de ultramar" de Crónicas TVE
  • Venres 9, 20:00 h Conferencia de Xosé Luís González Escalante "Xenese do Museo da Pesca e da Salga. Salgadeiras de Moreiras no Grove"
  • Sábado 10, 18:00 h Conferencia de Covadonga López de Prado Nistal "O Museo Massó. O museo que medrou dentro dunha fábrica de conservas"
  • Domingo 11. 11:00 h Saída a vela en embarcacións tradicionais. Ás 18:00 h Clausura coa proxección dos documentais "Cadernas de historia. ARte e oficio da dorna"(2014) e "Traiñas" (2016) de Víctor Gallego e Bruno Ordóñez, para Mardefondo Producións

Workshop Internacional Geografía de la producción pesquero-conservera en la antigüedad, entre el Atlántico y el Mediterráneo

Hoxe 30 de novembro e o 1 e 2 de decembro está tendo lugar no Museo do Mar de Galicia e no Museo Massó de Bueu o Workshop Internacional Geografía de la producción pesquero-conservera en la antigüedad, entre el Atlántico y el Mediterráneo que contará coa participación de investigadores españois, franceses, portugueses e galegos.

XVIII Concurso de corais da canción mariñeira. Bouzas

O vindeiro sábado 26 de novembro ás 20:00 h no IES Audiovisuais de Bouzas vai ter lugar o XVIII Concurso de corais da canción mariñeira. Organizado por Mariñeiros de Bouzas contará coa presenza da Coral Polifónica de M. Auxiliadora de Vigo, o Grupo Lembranzas Moañesas e a Coral Polifónica Amadeus de Vigo.

Distribuir contido

Hai pouco tempo desde Culturmar elaboramos un pequeno informe, A situación do patrimonio marítimo...
  Acaba de publicarse no DOG a Lei 5/2016, do 4 de maio, do patrimonio cultural de Galicia....