Novos usos para os nosos vellos barcos. Moaña

A Asociación Sueste organiza uns talleres dirixidos a persoas entre 16 e 35 anos para difundir o coñecemento das embarcacións tradicionais e dos elementos que as rodean (carpinterías, nós, técnicas de navegación, etc.). Para lograr este obxectivo realizaranse dous talleres nos estaleiros de Casqueiro e Carlagho en Moaña, un mañá sábado 1 de outubro e outro o sábado 8.

O taller do día 1 constará de nocións teóricas para recoñecer as embarcacións tradicioanis galegas, unha visita ás carpinterías, nocións básicas de nós e navegación e un obradoiro de modelismo de medios cascos. O horario será de 10:00 a 13:30 e de 16:00 a 20:00 h
O taller do día 8 consistira na navegación en embarcacións tradicionais.

Esta actividade patrocinada pola Dirección Xeral de Xuventude da Xunta de Galicia é gratuíta pero precisa inscrición previa que se pode facer enviando un correo co nome, idade, enderezo e teléfono a asociacionsueste@gmail.com.

IX Regata Porto Meloxo

Mañá sábado 1 de outubro ás 16-:00 h vai ter lugar a IX Regata Porto Meloxo, organizada por Amigos da Dorna Meca. Nesta regata a saída é desde terra pero co barco aparellado.
Lembramos que para participar hai que ter os seguros ao día e as medidas de seguridade precisas a bordo.

II Seminário “Mar, Educação e Património”

O vindeiro dia 30 de Setembro de 2016, a Biblioteca Municipal Rocha Peixoto da Póvoa de Varzim realiza a 2ª edición do Seminário “Mar, Educação e Património”, no marco da conmemoración dos 25 anos da lancha poveira do alto Fé em Deus.

O obxectivo desta xornada é compartir coñecementos, experiencias e traballos que os investigadores e profesionais de bibliotecas, arquivos, museus e escolas desenvolven sobre patrimonio marítimo e cultura do mar.

O programa terá duas partes, por un lado as literacias do mar, e por outro os proxectos en colaboración.

A participación é gratuita pero é preciso inscribirse previamente

Cambio de data da Regata de Porto Meloxo

A IX Regata de Porto Meloxo, prevista para o pasado sábado foi aprazada para o sábado 1 de outubro ás 16:00 h.

(Imaxe: Saída da regata de 2013, Amigos da Dorna Meca)

Sueste bota a andar unha nova Iniciativa Xove


A Asociación Sueste, xunto coa Direción Xeral de Xuventude da Xunta de Galicia, levará a cabo una actividades dirixida a moz@s de entre 16 e 35 anos os próximos días 1 e 8 de outubro baixo o epígrafe "Novos usos para os nosos vellos barcos", coa que pretenden que as personas participantes recoñecezan as embarcacións tradicionais galegas, así como as carpinterías de ribeira, incluíndo tamén obradoiros de nós mariñeiros, nocións de navegación e medios cascos.
As inscricións xestionanse no correo electrónico asociacionsueste@gmail.com.

Culturmar en Atlantikaldia. Errentería

Do 22 ao 25 de setembro celebrarase en Errentería (Gipuzkoa) Atlantikaldia, un festival de encontro entre culturas e música. O mar será o punto de conexión das diferentes actividades do festival. Durante eses días en Errentería poderanse ver concertos de música, exposicións, mercados artesáns, bailes, visitas guiadas, etc.

Culturmar estará presente en Atlantikaldía cunha mostra de embarcacións tradicionais galegas de pequeno porte. Desprazaremos ata Errentería seis embarcacións (dorna, gamela, choupán, bote polbeiro, carocho e buceta) pertencentes a Mariñeiros de Bouzas, Os Galos de Bueu, G.C. Ronsel do Seixo, e Terra de Outes, de todos eles viaxarán membros e unha representación da Xunta Directiva de Culturmar. Acompañando a estes barcos desprazaremos a exposición Patrimonio do vento e do sal e haberá unha mostra audiovisual sobre o traballo de recuperación que están a facer os colectivos de Culturmar, e sobre os diferentes eventos que organizamos, entre eles o Encontro de Embarcacións Tradicionais de Galicia.

O sábado 24 a mostra estará en Trintxerpe, un barrio de Pasaia a onde emigraron moitos galegos para traballar no mar a partir dos anos 20 do século pasado e dos que aínda hai moita presenza alí. Coa colaboración do Fato Daniel Castelao e o Concello de Pasaia montaremos unha exposición en terra coa que se quere dalgunha forma render homenaxe aos homes e mulleres que durante tanto tempo mantiveron viva a presenza galega en Trintxerpe.

(Imaxe: Exposición de barcos en seco en Pontevedra)

Trazando rumbos. 9º Congreso de European Maritime Heritage

Do 22 ao 24 de setembro vai ter lugar en Errentería o 9º Congreso de European Maritime Heritage, organizado por EMH e Albaola. Este noveno congreso busca reflexionar sobre as ferramentas que axuden a que o patrimonio marítimo xogue un papel no desenvolvemento económico, social e cultural. O congreso estudiará facilitar a aplicación práctica destas ferramentas e a elección de medidas adecuadas a cada caso.

I Xuntanza de Embarcacións Tradicionais de Betanzos

Mañá sábado 17 de setembro ás 16:00 h vai ter lugar a I Xuntanza de Embarcacións Tradicionais de Betanzos. Este evento está organizado por Barcos clásicos de Galicia e conta coa colaboración dos Patexeiros, dos Amigos das Embarcacións Tradicionais de Galicia e do Club Náutico de Ares. O lugar de amarre dos barcos será no Porto vello e está previsto que remate ás 20:00 h para poder aproveitar a marea para baixar o rio.

Ksal, o pintor do mar que triunfou en Terranova

José Casal Cerqueira, "Ksal", foi un maquinista de Coia nos barcos do bacallau en Terranova e logo nos do Gran Sol. Nas longas mareas do bacallau Ksal pintaba e nos seus cadros está o mar e os homes de Terranova, está o traballo e a vida diaria a bordo.
Ata agora practicamente descoñecido aquí a súa única exposición foi en Terranova, en Saint-Pierre-et-Miquelon. Agora esto cambiou. No Instituto Camoens en Vigo, na Casa Arines, están expostos 20 dos seus cadros nun proxecto da Asociación Casco Vello de Vigo coa colaboración de Xurxo Souto de quen parte a iniciativa de recuperación da figura de Ksal.

A exposición que foi inaugurada o pasado venres 9 estará aberta ata o 30 de setembro pero só os venres de 20:00 a 21:30 h. A exposición está acompañada por unha serie de actos :

Venres 16: "Gaiteiros do Mar", proxección do documental de Martín Rodas. Presentan Xerardo Feijoo e Xurxo Souto a charla cos gaiteiros do Hío protagonistas do documentario e posterior actuación musical deste grupo.

Venres 23: “Tesouros Humanos Vivos” proxección do documental “Isidro Marcial, 1º Tesouro Vivo do Berbés”. Presenta Xerardo Feijoo con posterior conversa con Isidro, un vello mariñeiro do Berbés, e coa xente do barrio relacionada co mar. Ao rematar actuación do Orfeón Mariñeiro do Berbés.

Venres 30: “Vigo/Terranova historias do Bacallau”. Presenta Xerardo Feijoo, colabora Xurxo Souto e todos os veciños que teñan algo que contar ao respecto. Logo actuarán os Falperrys.

Ao remate de cada venres a festa segue nos bares do casco vello tomando uns viños.

Parabéns á Asociación Casco Vello e a Xurxo Souto por recuperar para todos o traballo de Pepe Casal, pintor do mar.

A noticia en:

Brétemas
La Voz de Galicia

25 anos da "Fé em Deus"

O vindeiro día 15 de setembro ás 17:00 h na Biblioteca Rocha Peixoto da Póvoa de Varzim vaise conmemorar o 25 aniversario do bota-abaixo da Fé em Deus, a lancha poveira do alto.

A Biblioteca municipal Rocha Peixoto e a Cámara municipal da Póvoa organizan varios actos para lembrar ese bota-abaixo:

  • Sesión filatélica
  • Inauguración da exposición de modelos de embarcacións poveiras construídos por Manuel Agonia, mestre da Fé em Deus
  • Evocación do bota-abaixo, coa proxección dun filme sobre a lancha e a partilla de testemuños de persoas presentes naquel momento
  • Ladainha das lanchas, declamada por Libânia Feiteira Ferreira

O día 30 de setembro, no marco desta conmemoración vai ter lugar o II Seminario Mar, Educação e Património. O obxectivo deste seminario é compartir coñecementos e experiencias de bibliotecas, arquivos, museos, escolas e centros de investigación arredor do patrimonio marítimo e a cultura do mar.

Parabéns aos amigos poveiros por estes 25 anos da lancha. A nosa gratitude por manter vivo ese barco único, por ternos acompañado tantas veces e o desexo de bo vento e de moitos anos de novas navegacións.

Distribuir contido

  Acaba de publicarse no DOG a Lei 5/2016, do 4 de maio, do patrimonio cultural de Galicia....
  Desde a Federación Federación Galega pola Cultura Marítima e Fluvial (Culturmar) vemos con...