Hai uns días alguén roubou no Museo Mares de Cedeira unha plantilla metálica que se usaba para rotular as caixas dunha conserveira. Desde aquí enviamos o noso apoio ás persoas que tan duro traballaron para que Cedeira teña ese magnífico museo e pedímoslle a quen levou a plantilla que a devolva. Porque non é súa, porque alguén decidiu que un obxecto que era seu fose desfrutado por todas as persoas que quixeran velo, cedeuno para o Museo e non merece que se lle pague así e porque a xente que traballou para reunir as pezas do Museo e mantelo aberto tampouco merece ese pago.

Cando alguén dana ou rouba un elemento do noso patrimonio marítimo dánanos ou róubanos a todos. Cada peza do patrimonio, por pequena que sexa, ten un enorme valor.

A continuación transcribimos a mensaxe do Museo:

😢😢 Día triste. Roubáronnos,  ò museo e ò pobo de Cedeira. 😢😢

Alguén levou unha peza. Unha plantilla metálica de pintar nas caixas de peixe co nome da fábrica de Conservas do Cantábrico, con forma de óvalo e duns 20 cms.

Son pezas expostas que non están nas vitrinas porque non todo pode estar baixo chave. A quen o levou dicirlle que tiña dono, unha persoa de Cedeira que o gardaba na súa casa pero que foi xenerosa e quixo cedelo para que a xente, os visitantes do museo coñecesen a historia de Cedeira. Estamos doídos pero seguiremos coa porta aberta e o sorriso posto en cada visita. Se alguén sabe algo ou se quen o levou està a ler isto que recapacite e o devolva.

Ogallá este triste episodio nos axude a trasladar unha mensaxe: todo canto está exposto é de xente que o tiña na súa casa e quixo cedelo para que o pobo de Cedeira tivese un museo do Mar, para que se gardase o noso patrimonio material e inmaterial, para que se puxese en valor. As pezas non son do museo, son dos cedeireses e das cedeiresas… dun pobo acolledor que seguirá traballando e loitando por perpetuar a nosa historia mariñeira.

Compartide e axudade a difundir!